Jigerli bolsa er bolar,  birlikti bolsa el bolar

ALMATY Ásem Almatynyń turǵyndary Qazaqstan halqynyń birligi kúnin ádettegideı erekshe kóńil-kúımen qarsy aldy. Merekelik shara qala ákimdiginiń aldyn ala josparlaǵan baǵdarlama­syna saı – Ortalyq mádenıet jáne demalys saıajaıynan bastaý aldy. Ásirese, ústerine qyzyl-jasyl kıim kıip, aıryqsha nurǵa malynyp, kók­temdeı qulpyrǵan qazaqstandyq etnos ókilderiniń qýanyshynda shek joq. Búgin – Qazaqstandaǵy barsha ultty uıystyratyn, aǵaıynnyń basyn qosatyn aıtýly meıram! Jınalǵandar «Shabyt» jazdyq teatr alańyn qaýmalady. Qala turǵyndary men qonaqtaryn qala ákiminiń ýaqytsha mindetin oryndaýshy Ahmetjan Esimov zor shabytpen quttyqtady. Ol aıtýly merekeniń keshegi Prezıdent saılaýymen tuspa-tus kelýin atap ótip, almatylyqtarǵa, onyń kóp ult ókilderine saıası naýqanda belsen­dilik kórsetkeni úshin alǵysyn bildirdi. – Bizdiń armanymyz – bir, maqsa­tymyz – jalǵyz, ol – «Máńgilik El!» – dep túıindedi resmı ókil. Budan soń Ahmetjan Esimov Alma­tydaǵy etnomádenı ortalyqtardyń tańdaýly ókilderine Prezıdent Jar­lyǵyna sáıkes «Qazaqstan halqy Assam­bleıasyna – 20 jyl» merekelik meda­lin saltanatty jaǵdaıda tabys etti. Belgili óner juldyzy Naǵıma Esqalıeva án-shashý shashty. Budan keıin orys, ýkraın, uıǵyr, koreı, tatar tilderinde án aıtyldy. Bul kezde dýmandy konsert qalanyń barlyq ákimshilik aýdandarynda jalǵasyn tapqan... Ádettegi dástúr boıynsha Almaty aýmaǵynda sýburqaqtar iske qosyldy. Onyń eń mártebelisi – bas sýburqaq Tuńǵysh Prezıdent saıabaǵynda kókke shapshyp, aınalaǵa qońyr salqyn leppen ár berip tur. Budan basqa qala ortalyǵyndaǵy 9 sýburqaq ta iske qosyldy. Ákimdiktiń tabıǵı resýstar basqarmasynyń ókilderi qaladaǵy qalǵan 46 sýburqaq mamyr aıynyń sońyna deıin tolyq qosylady dep sendirdi. Mamyrdyń áni aıaýsyz tógilip, jyry shashyldy... Birlik merekesi halyqtyq jappaı serýenge ulasyp, shyraılana tústi. Talǵat SÚIINBAI, «Egemen Qazaqstan». AQTAÝ 50-ge tarta ult ókilderin qutty tósinde toǵystyryp, olardyń shat tur­mysynyń besigine aınalǵan Mańǵys­taýda birlik merekesin atap ótý 1 mamyrdan birneshe kún buryn bastaldy. Mektep, kolledj oqýshylarynyń etno­mádenı birlestikterdiń ókilderi­men taqyryptyq kezdesýi, etnomá­denı birlestikter arasynda «Belsen­di otbasy» otbasylyq saıysy, Túrik­menstan delegasııasynyń qatysýymen halyqaralyq «Men beıbitshilikti tańdaımyn» atty balalar sýretteri kórmesi men baıqaýy, sondaı-aq, Aq­taý, Jańaózen qalalarynda «Tatý­lyq-dostyqtyń kıeli besigi» atty Túrik­menstan óner juldyzdary jáne Mańǵys­taý ónerpazdarynyń birlesken konserti, «Yntymaǵy jarasqan táýelsiz elim» atty mektep oqýshylary arasynda ulttar dostyǵy baıqaýy, «Birligimiz jarasqan!» atty jastar baıqaýy, sýret­shi jastardyń sýret kórmesi, sporttyq jarystar syndy ondaǵan sharalar oblystyń aýdan-qalalarynda ótkizildi. Mereke kúngi shara Aqtaý qalasyn­daǵy Prezıdent dańǵyly boıynda orna­lasqan «Máńgilik alaý» kesheninen Aqtaý qalasy ákimdigi aldyndaǵy Astana alańyna deıin merekelik sherýmen bas­taldy. Barabanshylardyń bastaýymen sap túzegen sherýshilerdi aldymen etnomádenı birlestikter ókilderi, «Nur Otan» partııasy ókilderi, memlekettik qyzmetkerler, Sh.Esenov atyndaǵy KMTjIÝ ujymy, munaıshylar men «Aqtaý halyqaralyq teńiz-saýda porty», «MAEK-Qazatomónerkásip», «Qaz­telekom», ózge de ondaǵan ujymdar jalǵady. Dostyq, birlik, beıbitshilik taqyrybyndaǵy urandardy kóterip, jalaýlata aýqymdy 35 top bolyp júrip ótken sherýge qatysýshylar sany 5 myńǵa jýyqtady. Saltanatty sharada Mańǵystaý oblysynyń ákimi Alık Aıdarbaev Elbasy N.Nazarbaevtyń ulttar ara­syndaǵy dostyqtyń qazaqstandyq modelin qalyptastyrý men damytýdaǵy eren eńbeginiń nátıjesinde birneshe ulttyń ókilderi táýelsiz Qazaqstandy damytý jolynda bir jeńnen qol, bir jaǵadan bas shyǵara qyzmet etip jatqandyǵyn, kıeli Mańǵystaý óńirinde bul dástúrdiń óz sabaqtastyǵyn taýyp otyrǵandyǵyn aıta kelip, barsha mańǵystaýlyqtardy birlik merekesimen quttyqtady jáne budan bylaı da dostyq peıilden jańylmaı, el úshin birlese qyzmet ete berýge shaqyrdy. Sherý sońy merekelik konsertke ulasty. Ár ulttyń kórmelerimen birge merekelik saýda-sattyq jármeńkesi uıymdastyryldy. Mereke Aqtaý qala­syndaǵy «Aqtaý», «Báıterek», «Astana», «Dostyq» saýda-oıyn-saýyq ortalyqtarynda ártúrli oıyn-saýyq sharalarymen jalǵasyn tapty. Gúlaıym ShYNTEMIRQYZY, «Egemen Qazaqstan». Sýretti túsirgen  Talant QUSAIYN.   AQTО́BE Kóktemniń kúni Jer-anaǵa bar meıirimin tógip, shýaǵyn shashyp, kúlimdep-aq tur. Redaksııa tapsyrmasymen biz erte oıandyq pa desek, bizden erte turǵandar barshylyq eken. Ábilqaıyr han batyr eskertkishi aldyndaǵy alańǵa kún kóterilmeı-aq qaraqurym halyq jınalyp qalypty. Bular 1 mamyr – Qazaqstan halqynyń birligi kúnine oraı uıymdastyrylǵan «Seniń marafonyń – seniń jeńisiń» atty marafonǵa qatysýshylar bolyp shyqty. Qalanyń kásiporyndary men uıymdarynan jáne joǵary oqý oryndary men kolledj­derden, mektepterden barlyǵy 4,5 myń adam qatysqan marafonda erler – 21, áıelder – 10, al buqaralyq marafonshylar 3 shaqyrymǵa júgirip ótip, Qazaqstan Respýblıkasynyń Tuńǵysh Prezıdenti N.Nazarbaev atyndaǵy ortalyq saıabaqqa jınaldy. Munda da mereke áldeqashan bas­talyp ketken. Túrlenip-túlep ketken saıabaq ortasyndaǵy úlken sahnadan san ulttyń áýezdi úni asqaqtaıdy. Shaıdaı ashyq aspannan meıirim tógilýde. Merekege jınalǵan halyq nópiri sát saıyn tolyǵa túsýde. Saýda qatarlary da san boıaýǵa malynǵandaı ádemilenip ketken. Sahnada dostyq pen birliktiń belgisindeı shańyraq kóterilip, onyń astyna jınalǵan oblystaǵy etnomádenı birlestikterdiń ulttyq kıimderin kıgen ónerpazdary merekeniń sáni men saltanatyn arttyryp tur. 1 mamyr – Qazaqstan halqynyń birligi kúni merekesiniń saltanatty ashylýynda oblys ákiminiń orynbasary Sara Nurqatova qysqasha sóz sóılep, elimizdegi ultaralyq dostyq pen birliktiń tereńnen tamyr tartatynyn, oǵan Elbasy N.Nazarbaev ustanǵan sarabdal saıasattyń berik irgetasyn qalap otyrǵanyn jetkizdi. Sodan keıin elimizdegi tatýlyq pen turaqtylyqqa eleýli úles qosyp júrgen etnomádenı birlestikter tóraǵalary men múshelerine «Qazaqstan halqy Assambleıasyna – 20 jyl» merekelik medalin tapsyrdy. Merekelik saltanat barysynda marafon jeńimpazdary marapattalyp, olarǵa aqshalaı jáne eskertkish syılyqtar tarsyryldy. Merekelik sharaǵa jınalǵandarǵa «Dostyq» oblystyq jáne «Qazaqstan dostyqtyń mekeni» atty aımaqtyq festıvaldarynyń laýreattarynyń gala-konserti usynyldy. Oblys ortalyǵyndaǵy alańdar men alleıalarda da kóktem shýaǵymen shyraılanǵan merekelik kóńil-kúı jalǵasyn tapty. Satybaldy SÁÝIRBAI, «Egemen Qazaqstan». ATYRAÝ Jyl saıyn Atyraýda Qazaqstan halqynyń birligi kúni merekesin Isataı men Mahambet batyrlar eskertkishi boı kótergen alańda atap ótedi. Bul joly da solaı boldy. Jurtshylyq erteńgilik atalǵan alańǵa qaraı top-tobymen aǵyldy. Ulttyq kıimderin kıip, bir-birin qol alysyp, tós qaǵys­tyrǵan túrli etnos ókil­­deri bir-birimen aıtýly merekemen qut­tyqtap jatty. Aıtqandaı, óńirde 17 etno­má­de­nı birlestik ókilderi tatýlyq pen tu­raq­tylyqty, dostyq pen birlikti ny­ǵaıtýǵa laıyqty úlesin qosyp keledi. Alańǵa jınalǵan jurtshylyqty  oblys ákimi  Baqtyqoja Izmuhambetov quttyqtap, el birliginiń mańyzyna keńinen toqtaldy. О́ńirdiń bir top soǵys jáne eńbek ardagerine memlekettik marapattar tapsyrdy. Sonymen birge, el birligin nyǵaıtý, beıbitshilik pen kelisimdi saqtaý jáne rýhanı mádenıetti damytýǵa qosqan úlesi úshin «Birlik» altyn medaline «Tatýlyk» tatar-bashqurt etnomádenı birlestiginiń jetekshisi Gúlsına Baıkenova men «Alııa» evreı etnomádenı birlestiginiń jetekshisi Pavel Tkach ıe boldy. – Bizdiń elimiz táýelsizdigin alǵaly beri kóptegen jetistikke qol jetkizdi. Qazirgi tańda áleýmettik-ekonomıkalyq jaǵdaıymyz jaqsara tústi. Elimizdegi barlyq etnos ókilderi bir-birimen tatý, óz tilin, mádenıetin damytýǵa múmkindik aldy. Sonymen birge, bári de  memlekettik tildi  qurmetteıdi. Eldegi tatýlyqtyń nyǵaıǵany bıylǵy Prezıdent saılaýynda jáne bir ret dáleldendi, – deıdi  «Tatýlyk» tatar-bashqurt etnomádenı birlestiginiń jetekshisi Gúlsına Baıkenova. Bul kúni etnomádenı birlestikterdiń músheleri áýelete án saldy, myń burala bı bıledi. Olar tek óz tilderinde ǵana emes, qazaq ánderin de shyrqady. Joldasbek ShО́PEǴUL, «Egemen Qazaqstan».  KО́KShETAÝ Aqmola óńirindegi bıylǵy 1 mamyr merekesi «Qazaqstan halqynyń dostyǵy» ataýyndaǵy keń aýqymdy fes­tıval retinde atap ótildi. Altyn kún shapaǵyna bólengen kerbez Kókshetaý bar jasaýymen jarqyrap tur. Kósheler men alańdarda oblys aýmaǵyndaǵy tatý-tátti tirshilik keship otyrǵan etnos ókilderiniń barlyǵy ózderiniń ulttyq kıimderimen saltanat quryp, án-bıden shashý shashýda. Festıval Abylaı han alańyndaǵy 300 mektep oqýshysynyń «Beıbitshilik pen dostyq – balalar kózimen» atty asfalttaǵy sýret konkýrsymen bas­talýy aıryqsha mańyzdy der edik. Máselen, qaladaǵy №12 mekteptiń sýret-syzý pániniń muǵalimi, respýblıka oqý-aǵartý isiniń úzdigi Mútállap Isqaqov óziniń 24 oqýshysynyń «Meniń Qazaqstanym!» taqyrybyndaǵy sýretterinen balalar qııalyndaǵy erteńgi Máńgilik Eldi kórýge bolatynyn aıtady. Mundaıda eskertkish tuǵyrdaǵy Abylaı babamyz da «bárekeldisin» bildirgendeı boıyńdy jyly sezim kerneıdi. Bul áserdi Abylaı han men Táýelsizdik alańdaryn jalǵasty­ra­tyn alleıadaǵy qylqalam sheberleri men dızaınerlerdiń, sáýletshiler­­diń ıntellektýaldy «Dostyq dańǵyly» shy­ǵarmashylyq kórmesi de qalyńdata túsedi. Kókshe tórinde elimizdiń Ánurany qalyqtady. Táýelsizdik alańyndaǵy shadyman jurtqa oblys ákimi Sergeı Kýlagın sóz arnap, aqmolalyqtardyń merekeli jylǵy eńbek tabystaryna, qoǵamdyq jáne saıası ómirdegi belsendiligine rızashylyǵyn bildirdi. Sondaı-aq, ol Qazaqstan halqy Assam­bleıasy keńesiniń sheshimimen bir top azamatqa «Birlik» altyn medali men «Qazaqstan halqy Assambleıasyna – 20 jyl» merekelik medaldaryn tabys etti. Festıvalǵa qatysýshylardy etnomádenı ortalyqtardyń basshylary men belsendileri qyzý quttyqtady. Aýqymdy sharada kókshelikter nazaryna alty tarıhı tarmaqtan turatyn teatrlandyrylǵan kórinis usynyldy. Kóz aldymyzda Qazaq handyǵynyń qurylýynyń, deportasııaǵa ushyraǵan ulttar men ulystardyń Qazaq jerin mekendeýiniń, Uly Otan soǵysyndaǵy Jeńisimizdiń, tyń ıgerý kezeńiniń, búgingi shat turmysymyzdyń shejiresi jyljyp ótip jatyr. Bul sherý bolashaq maqsattarmen ushtasyp ketetindigimen de ǵajap. Mereke halyq dostyǵynyń ortaq dastarqan baılyǵymen, keń kólemdi konserttik baǵdarlamalarmen jalǵasty. Aýdandardaǵy alaqaı meıram da tanymdyq sıpat aldy. Baqbergen AMALBEK, «Egemen Qazaqstan». Sýretti túsirgen Tólegen QOSShYǴULOV. QARAǴANDY Elimiz ómirindegi qýanyshty oqıǵa­ǵa tabıǵat ózi de syı jasaǵandaı mamyr­dyń alǵashqy kúni nuryn molynan tógip, adamdar men qala ajaryn odan saıyn jaınatyp jiberdi. Jan-jaqtan aǵylǵan qaýym qatary mejeli ýaqyt­ta qalyńdaı túsip, uzynnan-uzaq Buqar jyraý dańǵyly lyq toldy. Qol­tyqtasa sap túzep, ár tilde qosyla án shyrqap, baqytty turmys pen tatý-tátti ómirge shattyq esken sherý kó­terińki kóńil kúımen alǵa basty. Or­taq tilek, bir maqsat toǵystyrǵan mere­­kelik saltanatqa qatysýshylar «Alǵa, Qa­zaqstan!», «Biz Nazarbaevpen bir­ge­miz!» dep bir kisideı ún tastap, Táý­el­­sizdik eskertkishin gúl shoqtaryna kómkerdi. Oblys ákimi Nurmuhambet Ábdibe­kov birlik pen tutastyqtyń, dostyq pen yntymaqtyń mereıli merekesimen quttyqtap, Elbasy atynan ár otbasyna qut-bereke, jarqyn bolashaq tiledi. Sherýshiler keýdeleri jaýyngerlik marapattarǵa toly soǵys ardagerlerine bas ıip, qurmet kórsetti. Aımaq basshysy ulttar arasyndaǵy baýyrlastyqqa, qoǵamdyq kelisimge uıystyrýshy birqatar etnomádenı birlestikterge oblys ákiminiń grantyn tapsyryp, belsendi múshelerine mereıtoılyq medaldar tabys etti. – Bárimiz shynaıy razylyqpen ­daýys berip, qaıtadan saılanǵan Elba­­symyz turaqtylyq pen damýdyń kepili. Sondyqtan biz N.Á.Nazar­baevty árdaıym qoldaımyz, – dedi oblys­tyq lıtvan «Lıtýanık» uıymy­nyń jetekshisi, Qazaqstan halqy Assam­­bleıasynyń múshesi Vıtalıı Tvarıonas. 10 myńnan astam adam bas qosqan sherý saltanaty qalanyń barlyq bóli­gin­de jalǵasty. Aýdandar ortalyqta­ry men kentterde de merekelik sherý­ler bolyp ótti. Keshkilik túngi aspandy ­otshashýlar jarqyratty. Aıqyn NESIPBAI, «Egemen Qazaqstan».   QOSTANAI 1 mamyr – Qazaqstan halqynyń bir­ligi kúni Qostanaı qalasy jurtshylyǵy­nyń kópten kútken merekesi. Aýa raıy da adamdardyń dostyq kóńil kúıindeı rııasyz shýaǵyn tókti. Kópten beri qubylǵan kóktemniń kúni jarqyrap, kók zeńgir aspan tup-tunyq bolyp tur. Jer-dúnıe jasyl túske enip, qul­pyra túsken. Tal-terek búrshik atyp, qaıyń syrǵa taqty. Ortalyqta mere­ke­lik dýman tańerteńnen bastaldy. Qa­zaqtyń jáne túrli ulttardyń án-kúıi mere­keniń shattyǵyn eseledi. Orta­lyqta uıymdastyrylǵan túrli ulttar­dyń mýzykalyq aspaptary kórmesin tamashalaǵandar olardan tógilgen shyǵarmalardy taza tabıǵı kúıinde tyńdady. – «О́nerde shekara joq» degen ras. Merekege kelip qanshama ult­tyń buryn ózim kórmegen mýzykalyq aspaptaryn tamashaladym. Maǵan ózimizdiń dombyra, qobyzymyz jáne qatar júrgen orystyń, tatardyń syrnaıy men balalaıkasy tanys edi. Al armıandardyń, koreılerdiń, che­shenderdiń, ázerbaıjandardyń, taǵy basqalardyń aspaptaryn birinshi ret kórgenimdi de jasyrmaımyn. Qyrǵyzdyń qomyzyn qyrǵyz balaǵa oınatyp biraz tyńdadym. Koreıdiń barabandaryn ózimizdiń qostanaılyq qyzdar qalaı ádemi urady, – dep ádemi áserin bólisti Qostanaı qalasynyń turǵyny Jamal Medebaeva apaı. Sonymen qatar, merekege jınalǵan qostanaılyqtar ár ulttyń ydystaryn da tamashalady. – Bıylǵy mereke Qazaqstan halqy Assambleıasynyń, Konstıtýsııamyzdyń – 20, Jeńistiń – 70 jáne Qazaq handyǵynyń 550 jyldy­ǵymen tuspa-tus keldi. Sondyqtan biz bıyl bul merekeniń tanymdyq jaǵy­na kóp kóńil bóldik. Túrli ulttar mýzy­kalyq aspaptarymen qatar, túrli ult­tardyń paıdalanatyn ydystary kór­mesin de usynyp otyrmyz. Barlyq jaqsy qasıet otbasynan darıdy. Dastar­qan basynda bereke bolsa, elimiz­de de tynyshtyq, beıbitshilik bolady dep túıdik. Ydys­tar tarıhyn tamasha­laǵandar kóp, – deıdi oblystyq mádenıet basqarmasy­nyń ­­basshysy Larısa Seroýs. Balalardyń tasjolǵa salǵan sýreti mereke sánin de, mánin de arttyra tústi. Halyqtyq án-bı, oıyndar dostyq pen birliktiń saltanatyndaı kórindi. Názıra JÁRIMBETOVA, «Egemen Qazaqstan». QYZYLORDA Bereke men birliktiń týy jelbirep, eńbek pen dostyqtyń kúıin shertetin ǵajaıyp mezgildi Syr jurtshylyǵy da asyǵa kútedi. «Birlik pen tatýlyq mekeni – Qazaqstan». «Tilegi birdiń júregi bir». «Birligi jarasqan Qazaqstan!» dep urandaǵan qyzylordalyqtar merekeni toılaýdy kúnmen talasyp bastap ketti. Eń aldymen, barlyq mekemelerdiń qatysýymen sherý uıymdastyryldy. Eńbek adamdarynan bastap, eldiń damýyna ózindik úles qosyp júrgen azamattar birliktiń týyn jelbiretip sherýge qatysty. Munan soń tatýlyǵy tuǵyrly, birligi berekeli, tirligi merekeli Syr eliniń halqyn oblys ákimi Qyrymbek Kósherbaev quttyqtady. – Biz bir maqsat, bir múdde, bir bolashaq jolyna jumylǵan qýatty elmiz. Qoǵamdyq kelisim men saıası turaq­­­tylyq – bizdiń eń joǵary baılyǵy­myz. Bul jetistikti baǵalaý, ony saqtaý jolynda aıanbaı eńbek etý – árbir Qa­­­zaq­stan azamatynyń mindeti. Týǵan jerdiń tósinde, beıbit eldiń ishin­de el birligin saqtaýǵa atsalysaıyq! Beıbit ómir­diń berekesi, halqymyzdyń ynty­maq, birligi arta bersin,– dedi aımaq bas­­­­shysy. Ulttar tutastyǵy men halyqtar dostyǵynyń arqasynda búginde memleketimiz órkendep, ilgeri basyp keledi. Syr elinde 70-ke jýyq ózge ult pen ulystyń ókilderi turady. 11 etnomádenı ortalyq bar. Barlyǵy mereke kúni konserttik baǵdarlama daıyndap, birliktiń bekemdigin kórsetti. Oblystyń barlyq qala, aýdan, aýyldarynda mereke joǵary deńgeıde atalyp ótti, túrli sport saıystary, fleshmob uıymdastyryldy. Erjan BAITILES, «Egemen Qazaqstan».   ORAL 1 mamyr – Qazaqstan halqy bir­ligi kúni Aqjaıyq aspanynan kún shýaǵy molynan tógilip, batys­qazaq­standyqtardyń kóńil-kúıi de tabıǵatpen úndestik tapqandaı óte kóterińki boldy. Osyndaı shat-shadyman ahýal aýany Oral qalasy men oblys aýdandarynda ótkizilgen merekelik sherýler kezinde de aıqyn ańǵarylyp turdy. Onyń sońy konserttik baǵdarlamalar men jármeńkelerge ulasty. Birinshi mamyr kúni qarsańynda Oral óńirinde barlyq turǵyndardy birlik pen tatýlyqqa jáne yntymaqqa úndeıtin ári osy úsh tuǵyrdy odan ári tereńdete túse alatyn máni men maǵynasy zor is-sharalar kesheni márege jetti. Sonyń biri – Qazaqstan halqy Assambleıasy jylyna oraı oblysta uıymdastyrylǵan «Beıbitshilik pen kelisimniń jol kartasy» estafetasy. Bul merekelik megajoba bıylǵy jyldyń aqpan aıynda bastaý alyp, osy rııasyz rásimge saı Oral qalasynyń delegasııasy Zelenov aýdanyna estafetany tapsyrǵan bolatyn. Sol ýaqyttan beri bul ıgi is kóp etnosty óńirdiń barlyq túpkirleri men eldi mekenderin qamtyp, turǵyndardyń yntymaǵyn arttyryp, olardyń arasyndaǵy mádenı-áleýmettik baılanystardy odan ári jetildirýge yqpal jasady. Osylaısha keshe merekelik estafetany Terekti aýdanynyń delegasııasy Oral qalasyna qaıta jetkizdi. Biz birlik kúni Oral qalasynyń ortalyq alańy arqyly merekelik sherýden júrip ótken bir jas turǵyndy sózge tartqan edik. Ol ózin Igor Spırıdonov, Batys Qazaqstan oblystyq Qazaqstan halqy Assambleıasy janyndaǵy jas­tar qanatynyń tóraǵasymyn dep tanystyrdy. Kózinde ot, boıynda jiger men qaırat birden baıqalatyn jas óren bizge óz tilegin bylaısha jetkizdi: «Jyl saıyn 1 mamyr kúni keletin Qazaqstan halqy birligi kúnin aıryq­­sha tereń sezimmen qarsylaımyn. Jas­tar eldiń úlken úmit artatyn strate­gııalyq resýrsy. Men ózimniń táýelsiz Qazaqstanda turyp ómir súrip jatqa­nymdy únemi maqtanysh etemin. Son­daı-aq, qashanda Memleket basshysy saıasa­tyn qoldaıtyn belsendi jastar qata­rynda júrgim keledi. Biz sapaly bilim alyp, ıntellektýaldyq múmkindigimizdi damytýǵa múddelimiz. Qazir Qazaqstan halqy Assambleıasynyń jastar qanaty Prezıdent belgilegen beıbitshilik pen kelisim baǵytyn iske asyrý úshin serpindi isterge bastamashy bolyp otyr». Temir QUSAIYN, «Egemen Qazaqstan».   О́SKEMEN Shyǵys jurtshylyǵy elimizdiń birlik kúnin – «Men – Qazaqstannyń patrıo­tymyn!» saltanatty sherýimen qarsy aldy. Oblys ortalyǵyndaǵy mere­­kelik sherýge 15 myńnan astam qala tur­ǵyndary men qonaqtary qatysty. О́ńirdiń barlyq aýdandary men qala­larynda, aýyl-aımaqtarynda aıryqsha sán-saltanatymen ótken merekede óske­mendikter Astana kóshesinen bas­tap Respýblıka alańyna deıin sherý uıymdas­tyrdy. 5518 áskerı bóliminiń orkes­tri bastaǵan saltanatty sherýge túrli etno­mádenı birlestikterdiń ókilderi, baıkerler men «Bıpek avto» avtokólikter kerýeni, «Kazsınk», Úlbi metallýrgııa zaýyty, О́skemen tıtan-magnıı kombınaty, «Azııa Avto» syndy óńirdegi 88 kásiporyn men uıymdardyń jumysshylary, memlekettik mekeme­lerdiń qyzmetkerleri, joǵary jáne orta oqý oryndarynyń stýdentteri, mektep oqýshylary qatysty. – Elimizdiń baǵa jetpes baılyǵy – berekesi men birligi jarasqan, tatýlyq pen kelisimniń týyn tikken kópultty halqy. Bul – Qazaqstan halqynyń myzǵymas dostyǵynyń, Otanǵa degen máńgilik mahabbatynyń merekesi, – dedi aımaq jurtyn quttyqtaǵan óńir basshysy Danıal Ahmetov. Sherýge qatysýshylar Qazaqstan halqy Assambleıasynyń 20 jyldyq mereıtoıyna oraı aspanǵa 20 aq kógershin men 20 myń shar ushyrdy. Birlik kúni merekelik konsertke ulasyp, dostyqty tý etken óner­paz­dar óńir jurtshylyǵyn án-bıimen qýantty. Gir tasyn kóterý, qol kúres, arqan tartý, shahmat jáne doıby oıyndarynan saıystar ótti. Sondaı-aq, bul kúni «Metallýrg», «Jastar», «Sáýletaı» jáne Jambyl atyndaǵy saıabaq syndy kópshilik demalys oryndary ashyldy. Saılaýǵa belsene qatysqan oqý oryndary mara­pattaldy. Mereke keshkilik «Stý­­dent kóktemi» gala-konsertimen, jastardyń bı keshimen jalǵasty. Dýman ANASh, «Egemen Qazaqstan».   PAVLODAR Bıylǵy 1 mamyr – Qazaqstan halqy­nyń birligi kúni merekesi, tatýlyq pen turaqtylyq taqyrybyna arnaldy. Kún de jylyn­­dy. Aınala qulpyryp jaınap tur. Ásem áýender shalyqtap, búkil qalany mere­kelik kóńil-kúı dýmanǵa bólegen. Al, osydan bir kún buryn oblys ortalyǵyndaǵy Dostyq úıinde oblys ákimi Qanat Bozymbaev óńirdiń etnomádenı birlestikteriniń basshylaryna arnaıy granttar tabys etti. Birlik kúni merekesine oraı quramynda mordva, ýdmýrt, komı-permıak, marıı, vengr ulttary ókilderi bar ­Fıný­­gor etnomádenı ortalyǵy ashyldy. Ýdmýrtııadan qonaqtar kelip, etnomádenı birlestik ashylýyna oraı, alań ortasynda tolqı sóz sóıledi. Osy jaqsy jańalyqtardyń sońy keshe qala turǵyndary, qonaq­­tary ortalyq alań men Ertis ózeni jaǵa­laýynda, qalalyq mádenıet jáne demalys saıabaǵynda jalǵasyp, qyzyqqa toly dýmandy merekelik sharalarǵa toly boldy. Merekeniń «Tilegimiz – tatýlyq, tiregimiz – turaqtylyq» taqy­rybyna saı ekran arqyly arnaıy jasalǵan merekelik jýrnal paraqtary ashyldy. Qazaqstan halqy Assambleıasynyń 20 jyldyǵyna oraı etnomádenı birlestikter jáne qala jastarynyń qatysýymen teatr­lan­dyrylǵan qoıylym, etnomádenı birlestikterdiń konserti jáne Isa Baızaqov atyndaǵy oblystyq fılar­monııanyń konserttik baǵdarlamasy usynyldy. Ortalyq alańda halyq kóp. Oblys basshylyǵy, soǵys jáne eńbek ardager­leri quttyqtaý sózde­rin arnaýda. Mere­keniń sán saltanatyn qyzyqtaǵan úlkender, án shyr­qap, bı bılep qýanyshty jastar, qyzyl-jasyl sharlar kótergen kishken­taı bóbekter aınala dýman sánin keltir­di. Saǵat túski 12.00-de ortalyq alańda etnomádenı birlestikterdiń qol­danbaly shyǵarmashylyq jáne dás­túrli aspazdyq «Etnoqalashyq» sheber­lik kórmesi ótti. Balalar úshin Shapıto sırkiniń merekelik baǵdar­lamasy, ekzotıkalyq janýarlar men haıýan­dardyń zoopar­ki ashyldy. Jaǵalaý­da sporttyq oıyn-saýyq baǵdar­lamasy qyzsa, «Tatýlyqtyń tutqasy, birliktiń besigi», qalalyq máde­nı saýyq ortalyǵy men balalar shyǵar­mashylyq jáne tárbıe orta­ly­ǵy uıymdarynyń «Beıbit bolsyn bolashaq» merekelik konserttik baǵdarlamasymen jarasym tapty. Farıda BYQAI, «Egemen Qazaqstan». PETROPAVL Qazaqstan halqynyń birligi kúni Qyzyljar óńirinde de dostyq pen tatýlyqtyń, beıbitshilik pen myzǵymas turaqtylyqtyń merekesi retinde kóte­­riń­ki kóńilmen, jarqyn júzben asqaq rýhta atalyp ótti. Adamdar bir-birine amandyq, saýlyq joldap, elimizdiń aıbary asqaqtaı berýin tiledi. Qazaqstan halqy Assambleıasynyń 20 jyldyq mereıtoıymen tuspa-tus kelgen mereke el damýynyń qaryshty qadamy, bedel-abyroıymyzdyń asqaqtaý, ár shańyraqqa shattyq qonǵan, ulttar men ulystardy uıystyrǵan meıram retinde baǵalanyp, ulttyq qundylyq­­ta­­­rymyzdyń qadir-qasıetteri ulyqtaldy. Mereke saltanaty Táýelsizdik stelasy janynan bastaldy. Onda oblys ákimi Erik Sultanov turǵyndarǵa jyly lebizge toly quttyqtaýyn arnap, Elbasy atynan 36 soltústikqazaqstandyqqa «Qazaqstan halqy Assambleıasyna – 20 jyl» merekelik medalin tabys etti. Qalanyń barlyq shaǵyn aýdan­darynda uıymdastyrylǵan mereke­­­lik baǵdarlamalardy qyzyqtaǵan jurtshylyq qatary qalyń boldy. Dostyq úıinde ótken «Halyqtyń asyl qazynasy» atty baıqaýǵa 19 etnostyq klýb qyzyǵýshylyq kórsetip, óz nómirlerinde ortaq shańyraq astynda bir úıdiń balasyndaı, bir qoldyń salasyndaı tatý-tátti yntymaqta ómir súrip jatqan ulystardyń baıandy tirligin, berik birligin arqaý etti. «Qoǵamdyq kelisim» mekemesi uıymdastyrǵan «Máńgilik El: bir el – bir taǵdyr» konkýrsy kópshilik talǵamynan shyqty. Onda balalar ártúrli taqyryptar boıyn­sha sýret salýdan synǵa túsip, shy­ǵarmashylyq qarym-qabiletterin tanytty. Abaı men Pýshkın eskertkishi qasynda «Dostyqtyń saz álemi» mýzy­kalyq-bı kompozısııasy qanat qaqsa, «Assambleıa arýy» atty túrli etnos­tardyń ádemi arýlary qatysqan baıqaý da óz kórermenderin rıza etti. Demalys jáne mádenıet saıabaǵynda stýdent-jastar «Dostyq darhany» flesh-mob, qyzyqty konkýrstar uıymdastyrdy. Merekeniń sánin qazaqstandyqtardyń tatýlyǵy men kelisimin pash etken keshki merekelik konsert keltirdi. Ol shyn mánindegi dostyq án-jyr, bı arqaýyna aınalyp, qyr betin qyzǵaldaqqa toltyryp jibergendeı áserge bóledi. О́mir ESQALI, «Egemen Qazaqstan». Sýretti túsirgen Talǵat TÁNIBAEV.   TALDYQORǴAN Jetisý jerinde yntymaǵy jarasyp, birlikteri nyǵaıyp, baqýatty ómir súrip jatqan 103 etnos ókili Taldyqorǵandaǵy ortalyq alańǵa kóptep jınaldy. Adamdar arasyndaǵy qýanyshty tabıǵat-ana da qup kórse kerek, aspan asty shaıdaı ashyq. Aýada lúp etken jel de joq. Sáni men saltanaty artqan jetisý­­­lyqtardyń aldyna Almaty oblysynyń ákimi Amandyq Batalov shyǵyp: «Búgingi qýanysh – Otanǵa degen patrıottyq sezim men súıispenshiliktiń, turaqtylyq pen kelisim merekesi. Qazaqstan – bereke men birliktiń, dostyqtyń mekeni. Munda bir shańyraq astynda kóptegen ulttar men ulystar tatý-tátti ǵumyr keshýde. Sondyqtan da elimizdegi qoǵamdyq kelisim men saıası turaqtylyqty álem baǵalap, moıyndap otyrBúkil álem Elbasymyz Nursultan Nazarbaevtyń kemeńger Kóshbasshy, sańlaq saıasatker ekendigin taǵy bir moıyndady. Prezıdenttik saılaý eldiń birligi men turaqtylyǵyn nyǵaıta tústi. Halqymyz óziniń nurly bolashaǵyn Tuńǵysh Prezıdentpen baılanystyratynyn kórsetti. Táýelsizdik jyldary Qazaqstannyń ultaralyq kelisimi nyǵaıdy, saıası turaqtylyǵy bekemdene tústi, memlekettiń damýyna baǵyttalǵan baǵdarlamalar sátti júzege asyryldy. Osynyń bári – Prezıdenttiń senimdi jeńisiniń aıǵaǵy», – dedi oblys ákimi Halyqtyń erligi – eńbekte, ba­qyty – baýyrmaldyǵynda, jasam­­­­paz­dyǵy – jarqyn isterinde. Son­­­dyqtan beıbit ómirdegi tabysty isi­mizdi, bereke-birligimizdi maqtan etken merekelik basqosý Súıinbaı atyn­daǵy oblystyq fılarmonııa kon­serttik baǵdarlamasymen jalǵasyp, jalpyhalyqtyq merekemen ulasty. Nurbol ÁLDIBAEV, «Egemen Qazaqstan». TARAZ Qazaqstan halqynyń birligi kúni merekesi elimiz táýelsizdik alǵan jyldardan beri  jańasha sıpatqa ıe boldy. О́ıtkeni, birlik pen yntymaq, dostyq pen týysqandyq búginde kópultty Qazaqstannyń qarqyndy damýynyń kepili. Bıyl Qazaqstan halqy Assambleıasynyń 20 jyldyǵynyń elimizde keń kólemde atap ótilýi eldigimizdiń qalyptasýy men táýelsizdigimizdiń nyǵaıý tarıhynda aıryqsha ról atqarýda. Al, keshegi saılaýda Elbasy mereıiniń ústem bolýy kóp ultty halqymyzdyń Elbasyna degen ystyq yqylasy, sheksiz qurmetiniń kórinisi ekeni anyq. «Tatý eldiń shyǵar taýy bıik» degen mine, osy bolsa kerek. «Bul kún – halyq arasyndaǵy dostyqtyń belgisi, ózara baýyrma­­­­­shyldyq pen túsinistiktiń nyshanyna aınalǵan mereıli meıram. Bizdiń birtutas halqymyzdyń dástúrine enip, beıbitshilik pen ózara syılastyqtyń sımvolyna aınaldy. Aldymyzda Memleket basshysy belgilegen «Máń­gilik El» ulttyq ıdeıasy men «Qazaq­­stan-2050» Strategııasyn, «Nurly Jol» baǵdarlamasy men Bes halyqtyq reformany oryndaý maqsattary tur. Munyń barlyǵy da taǵdyry bir, Ota­ny bir halqymyzdyń keleshegi, urpa­ǵymyzdyń bolashaǵy úshin jasalýda. Jambyldyqtar da bar­sha qazaq­standyqtar sııaqty uly maqsat­tarǵa qol jetkizý jolynda jumyla eńbek etetinine senimdimin», – dedi áýlıe­­­ata­lyqtardy quttyqtaǵan Jambyl obly­synyń ákimi Kárim Kókirekbaev. Birlik pen yntymaqtyń almaıtyn qamaly, shyqpaıtyn shyńy, aspaıtyn asýy joq. Aıtýly merekeni jambyldyqtar kóterińki kóńil-kúıde atap ótip, Taraz qalasynyń «Dostyq» alańynda ótken merekelik sherýdiń sońy ulttyq jáne sporttyq oıyndar, óner maıtalmandarynyń konserti men kópshilik serýenge ulasty. О́ner árbir ultty bir-birine jaqyndastyratyn, teńestiretin qudyretti kúsh qoı. Sondyqtan da merekede aıtylǵan, túrli tilde aıtylǵan ándi de, túrli ulttar bılegen bıdi de eshkim jatyrqaǵan joq. Qaıta kóptiń kóńili dostyqtyń arnasynda toǵysty. Mereke keshkilik óner juldyzdarynyń konsertine ulasyp, jastar ózara bı jarystyrdy. Oralhan DÁÝIT, «Egemen Qazaqstan». Sýretti túsirgen Altynbek QARTABAI. ShYMKENT 1 mamyr – Qazaqstan halqynyń birligi kúni merekesi Shymkenttegi jańa Ákimshilik-iskerlik ortalyǵynyń alańynda ótti. Ońtústikte birligi jarasqan, bir úıdiń balasyndaı, bir qoldyń salasyndaı 100-den astam ult pen ulystyń ókilderi turady. Saltanatty merekede olar sherý tartyp, ulttyq áýender sarynymen alańǵa ótti. Minbege ulttyq-mádenı ortalyqtardyń tóraǵalary shaqyrylyp, oblys ákimi Asqar Myrzahmetov jurtshylyqty mereıli merekemen quttyqtady. Tarıhtyń qaı paraǵyn ashsań da eldiń ańsaǵan maqsat-muraty beıbitshilik bolǵandyǵyn, Qazaqstan Táýelsizdik alǵannan beri Elbasy osy uly murat jolynda talmaı jumys jasap kele jatqandyǵyn, búgingi memlekettik saıasattyń túpqazyǵy el birligi ekendigin  aıtqan oblys basshysy buǵan ońtústikqazaqstandyqtardyń da aıtýly úles qosqandyǵyna toqtaldy. Onyń aıqyn dáleli retinde keshegi prezıdenttik saılaýda halyqtyń tilegi bir arnadan toǵysyp, Qazaqstan halyqtarynyń yntymaqtastyǵy álemge máshhúr bolǵandyǵyn, Tonykók baba zamanynan amanat bolǵan Máńgilik El muratyna birge jetetindigin aıtty. Qazaqstan halqy Assambleıasy jylyn merekeleý aıasynda el birligin nyǵaıtýǵa, mádenıetaralyq únqatysýdy damytýǵa jáne qazaqstandyq pat­rıotızm­­­di qalyptastyrýǵa qosqan eleý­li úlesi úshin Tólebı aýdany «Taǵa­ı­na» jalpy orta mektebiniń dırektory Ka­dırov Osmanalı, Ońtústik Qazaq­stan mem­lekettik pedagogıkalyq ınstıtý­ty­nyń dosenti Kýrbanov Agapa­sha, M.Áýezov atyndaǵy Ońtústik Qazaq­stan memlekettik ýnıversıteti kafedra­sy­nyń meńgerýshisi Nadırov Kazım, Túr­kistan qalasyndaǵy dızaınerler oda­ǵynyń múshesi Hamarkýlov Nasyr «Bir­lik» altyn medalimen marapattaldy. Sondaı-aq, bir top azamatqa ult­ara­lyq birlikke sińirgen eńbegi úshin «Qazaqstan halqy Assambleıasyna – 20 jyl» merekelik medali tabys etildi. Birlik kúni oblystyń qoǵamdyq-saıası ómirine belsene qatysqany, dostyq pen ultaralyq kelisimdi nyǵaıtýǵa qosqan eleýli úlesi úshin oblystyq etnomádenı birlestikterge oblys ákiminiń granty tabys etildi. Etnomádenı ortalyqtardyń atynan E.Romanova men I.Hashımjanov sóz alyp, Máńgilik El muraty bolǵan Otanymyzdyń búgini men keleshegi kemel ekendigin aıtyp, merekege jınalǵan jurtty quttyqtady. Ánmen, kúımen astasqan meıram Ońtústikte osylaısha atalyp ótildi. Baqtııar TAIJAN, «Egemen Qazaqstan».